पढ्नै पर्ने

राजदरबार हत्याकाण्डको १८ वर्ष पूरा, घटना अझै रहस्यमै

काठमाडौं : राजदरबार हत्या भएको १८ वर्ष पूरा भइसक्दा पनि घटनाको तथ्य रहस्यमै छ । यसै सन्दर्भमा नेपाल समाचारपत्रले आजको अंकको अग्रभागमा तत्कालीन समयमै पुग्दै एउटा यस्तो सामग्री प्रकाशन गरेको छ । हेरौं समाचारपत्रमा छापिएको सामग्री जस्ताको तस्तैः

तत्कालीन श्री ५ बडामहाराजधिराज वीरेन्द्र वीरविक्रम शाहदेवलाई शुक्रबार साँझ नारायणहिटी राजदरबारमा भएको पारिवारिक भोजमा अकस्मात् चलेको गोली लाग्न पुगेको छ । मौसूफको स्थिति शनिबार बिहान ३ बजेसम्म आधिकारिकरुपमा स्पष्ट हुन सकेको छैन । मौसुफलाई उक्त गोली लागेको लगत्तै छाउनीस्थित सैनिक अस्पतालमा पुर्‍याइएको थियो ।

श्री ५ बडामहारानी ऐश्वर्य राज्यलक्ष्मीदेवी शाहलाई पनि सो क्रममा गोली लागेको छ । त्यसैगरी, श्री ५ युवराजधिराज दीपेन्द्र वीरविक्रम शाहदेवलाई पनि गोली लागेको छ । सो क्रममा श्री ५ नीराजन वीरविक्रम शाह, श्री ५ अधिराजकुमारी श्रुति राज्यलक्ष्मी देवी शाह, श्री ५ अधिराजकुमारी शान्ति सिंह, कुमार गोरखशमशेर जबरालगायत राजपरिवारका अन्य सदस्यहरुलाई पनि गोली लागेको छ । गोली लागेका सबैलाई छाउनीस्थित सैनिक अस्पतालमा पुर्‍याइएको छ ।

गोली लागेकामध्ये १५ जनाको मृत्यु भएको समाचारसूत्रहरुले उल्लेख गरे पनि समाचारको आधिकारिक पुष्टि भने हुन सकेको छैन ।

पारिवारिक भोजमा श्री ५ युवराजधिराजको विवाहको प्रसंग चलेपछि अकस्मात् पौने १० बजेतिर उक्त गोलीकाण्ड भएको समाचारसूत्रहरुको दाबी छ । शुक्रबार राति नै उक्त घटनाको लगत्तै पोखरामा रहिबक्सेका श्री ५ अधिराजकुमार ज्ञानेन्द्र वीरविक्रम शाहलाई हेलिकोप्टरबाट राजधानी ल्याइएको छ ।

उक्त घटनाको लगत्तै शुक्रबार राति नै मन्त्रिपरिषद्को आकस्मिक बैठक बसेको छ । त्यस्तै राजपरिषद् स्थायी समितिको आकस्मिक बैठक पनि बसेको छ । स्थिति स्पष्ट भइनसकेका कारण अति संवेदनशील अवस्थामा थप विवरणहरु किटानीका साथ खुलाउन नमिल्ने उच्च सूत्रहरुले बताएका छन् ।

स्मरण रहोस् आज १८ वर्ष बितिसक्दा पनि त्यो स्थिति स्पष्ट हुन सकेको छैन ।

प्रतिकृया दिनुहोस

पढ्नै पर्ने

/* */